På grunn av COVID-19 valde Radio Sunnmøre og ha si årlege Radiomesse digital i år fredag 6. november. Radiomessa gjekk ut med eit rekordresultat på over 300 000 kroner.
-Dette gjekk over all forventning. Eg kjenner engasjementet og støtta frå våre lyttarar langt inn i marg og bein, og det rører langt inni hjartet, seier ein overvelda dagleg leiar, Ragnhild Kristine Vartdal Espelund.
I år valde komiteen for Radio Sunnmøre si årlege radiomesse å la messa gå digitalt. Det var nerver i forkant for om ein då fekk selt nok lefser og bakst, og ikkje minst basarbok, i forhold til at ein kom til miste inntekt på kafèsal, grautsal, tombola og lynlodd. Og ikkje minst alle dei hundre som brukar å kome på den årlege radiomessa for å kjøpe småkaker og gjærbakst til jul.
-Vi ynskja å vere med på den felles dugnaden for å få ned smitta av koronaviruset, og aller helst bli kvitt dette viruset for godt. Og sidan mange av dei som er med og som er uunnværlege for at ein slik dag skal gå opp er i den eldre garde, så var det naturleg å avlyse den fysiske messa. Gjengen heiv seg rundt å baka i to veker over fire hundre lefser, haugar med aniskringler og ambrosiabrød, og mykje anna godt. Dette gjekk som varmt, eventuelt fryst, kveitebrød på dagen, fortel ei nøgd Vartdal Espelund.
Kokte på telefonenDet kokte på telefonlinjene midt på dag, så vi måtte restarte linja. Folk ringde og bestilte varer og lodd, og fleire gav ei messegåve og takka for at vi ikkje hadde fysisk messe i år. Det var heilt fantastisk å få vere med på. Då siste sendetime kl. 22 var over var resultatet på 200 000 kroner, og oppå dette gir ein anonym givar 100 000 kroner. Dette er til å bli glad, rørt og stolt over, seier Vartdal Espelund.
-Utan dei frivillige og engasjerte lyttarane til Radio Sunnmøre ville dette aldri gått. Det er heilt tydeleg at denne radioen betyr svært mykje for svært mange. Ei stor takk rettast til alle i hop, legg ho til.
Ein radio som betyr mykje
Den digitale radiomessa vart gjennomført med fleire gjestar i studio, som utviklingsminister Dag Inge Ulstein, artist Adam Cliff/Ole Andreas Høyberg, og fleire av dei frivillige som var med og fekk dagen til. Radio Sunnmøre sender over heile Sunnmøre på FM og DAB, i tillegg til døgnet rundt på internettradio og via appen Radioplayer.
-Det er fantastisk at ein liten lokalradio som Radio Sunnmøre når fleire tusen lyttarar på Sunnmøre kvar veke, i tillegg i år har hatt rundt 20 000 brukarar som ein når med intervju lagt ut på heimesida og podkast, og har over 6000 aktive følgjarar på facebook. Det er heilt tydeleg på oppslutninga av denne digitale radiomessa at Radio Sunnmøre er ein lokalradio som mange ynskjer å ha, og det varmar, avsluttar dagleg leiar Vartdal Espelund.
